നെയ്തെടുത്ത മനോഹരമായ ഒരു പട്ട് സാരിയില് നിന്ന് കാവിയുടെ അന്തര്മുഖതയിലേക്കുള്ള ഒരു മാറ്റം- കാഞ്ചീപുരത്ത് നിന്ന് തിരുവണ്ണാമലയിലേക്കുള്ള യാത്രയെ ഇങ്ങനെ വിശേഷിപ്പിക്കാം.. തിരുവണ്ണാമല ഒരു ക്ഷേത്ര ഗ്രാമമാണ്.. നോക്കുന്നിടത്തെല്ലാം ക്ഷേത്രങ്ങളും കാവി വേഷധാരികളും.. ഈ ഗ്രാമത്തിന്റെ ആത്മാവ് മുന്പില് തലയെടുപ്പോടെ കാണുന്ന അരുണാചല പര്വ്വതമാണ്.. ഒരു സഞ്ചാരിയുടെ മനസ്സോടെ ഇതിനപ്പുറം കടക്കാന് ആകില്ലെന്ന് തന്നെ പറയാം.. ഇനി ഉള്ള കാഴ്ചകള്ക്ക് ഒരുങ്ങേടത് മനസ്സാണ്..
അരുണാചല പര്വതങ്ങള്ക്ക് താഴെയായാണ് ദക്ഷിണേന്ത്യയിലെ തന്നെ ഏറ്റവും വലിയ ക്ഷേത്രങ്ങളിലൊന്നായ അരുണാചല ക്ഷേത്രം.. നാല് ഗോപുരങ്ങളോട് കൂടിയ വലിയ വിശാലമായ ക്ഷേത്രമാണിത്..ദീപങ്ങളെ ആരാധിക്കുന്ന ക്ഷേത്രത്തില് തൃക്കാര്ത്തി ക പ്രധാന ദിവസമാണ്..
സാക്ഷാല് ശിവന് തന്നെ ആണിവിടെ പര്വ്വതമായുള്ളത് എന്നാണു വിശ്വാസം.. ചുവന്ന പര്വ്വതം എന്നാണു അരുണാചല പര്വ്വതത്തിന്റെ അര്ഥം.. ഇതിനു പിറകിലുമുണ്ട് ഒരു കഥ.. ഒരിക്കല് വിഷ്ണുവും ബ്രഹ്മാവുമായി തര്ക്കം നടന്നപ്പോള് അത് പരിഹരിക്കാന് ശിവന് അഗ്നിയായി രൂപമെടുത്തു.. ആ അഗ്നിയില് ഈ പര്വ്വതവും ജ്വലിച്ചു.. അങ്ങനെ ഇത് ചുവന്ന പര്വ്വതമായി.. ശിവന് പര്വ്വതമായി നില്ക്കുന്ന സങ്കല്പം അരുണാചലത്തിന്റെത് മാത്രമാകും.. 2668 അടി ഉയരമുള്ള അരുണാചലം കൃത യുഗത്തില് അഗ്നി പര്വ്വതവും ത്രേതാ യുഗത്തില് രത്നങ്ങളുടെ മലയും ദ്വാപര യുഗത്തില് സ്വര്ണ മലയും കലിയുഗത്തില് മരതക മലയുമാണെന്നാണ് വിശ്വാസം.. വിശ്വാസങ്ങള് എന്തായാലും അരുണാചലം ലോകത്തിന്റെ എല്ലാ കോണില് നിന്നും വിശ്വാസികളെ തന്നിലേക്ക് അടുപ്പിക്കുന്നു.. ഈ പര്വ്വതത്തില് മാത്രമായി 7 ക്ഷേത്രങ്ങളുണ്ട്.. അനവധി ഗുഹകളും.. ആത്മജ്ഞാനത്തിന്റെ കൈവഴികളിലൂടെ സഞ്ചരിച്ച് രമണ മഹര്ഷി എത്തിച്ചേര്ന്നത് ഈ പര്വ്വതനിരകളിലാണ്.. പിന്നീടൊരു മടക്കമുണ്ടായില്ല .. ഇവിടുത്തെ നിശബ്ദതയില് അദ്ദേഹം തപസ്സിരുന്നു.. ഇരുളടഞ്ഞ ഗുഹകള്ക്കുള്ളില് ആഴ്ചകളും മാസങ്ങളും നീണ്ട തപസ്സ്.. 7 ക്ഷേത്രങ്ങളിലുള്ള ഗുഹകളും രമണ മഹര്ഷി തപസ്സിരുന്നവയാണ്.. ഇന്നും ഈ ഓരോ ഗുഹയിലുമുണ്ടാകും ആത്മശാന്തി തേടി വന്ന സ്വദേശിയോ വിദേശിയോ ആയി ആരെങ്കിലും.. പ്രശസ്തരുണ്ടാകും ചിലപ്പോള് ആ കൂട്ടത്തില്.. ചിലപ്പോള് നേരെ മുന്പില് കാണുന്ന മുഖം രജനീകാന്തോ ഇളയരാജയോ ആകാം.. ഇവിടെ എത്തുമ്പോള് ആര്ക്കും പിന്നെ വിശേഷണങ്ങള് ഇല്ല.. എല്ലാവരും വരുന്നത് മനശാന്തി തേടിയാണ്.. .ജീവിത പ്രശ്നങ്ങളെ ഇറക്കി വെയ്ക്കാനായാണ്.. ഇവിടെ വലുപ്പ-ചെറുപ്പങ്ങളില്ല.. രമണ മഹര്ഷിയുടെ ആശ്രമത്തില് പ്രാര്ത്ഥനകളില്ല.. നിശബ്ദത ആണിവിടെ എല്ലാ ചോദ്യങ്ങള്ക്കുമുള്ള ഉത്തരം.. ചൂഴ്ന്നു നില്ക്കുന്ന മൌനമാണ് എല്ലായിടത്തും.. ഈ പര്വ്വതത്തിന്റെ നിശബ്ദതയില് അലിയാത്ത ദുഃഖം ഉണ്ടാകില്ല.. പര്വ്വതത്തിന്റെ താഴ്വാരത്തായുള്ള കിണറിലെ ജലം മുലപ്പാല് തീര്ത്ഥം എന്നാണറിയപ്പെടുന്നത്.. ഇതിനടുത്തുള്ളത് മാമര ഗുഹ..എത്തുന്നവരില് കൂടുതലും വിദേശികള് ആണെന്ന് പറയുന്നു ഇവിടുള്ളവര്..
WELL WRITTEN GAYATHRI.
ReplyDeleteThanks Akhilkrishna
Delete